Útgefið efni

Fundir FME um QIS4

25.6.2008

Þann 9. júní sl. og 12. júní sl. hélt Fjármálaeftirlitið (FME) sérhæfða fundi vegna QIS4, sjá nánari upplýsingar hér. Fyrri fundurinn var ætlaður skaðatryggingafélögum og sá síðari líftryggingafélögum.
Á fundinum 9. júní fyrir skaðatryggingafélög var fjallað um útreikning vátryggingaskuldar, þ.á m. eftirtalin atriði:

  • Greinaskiptingu (en slysa- og sjúkratryggingar hér á landi flokkast undir „Accident and health – other“).
  • Notkun á tölfræðilegum aðferðum og upplýsingagjöf um hvaða aðferð er notuð.
  • Kröfur vegna útreiknings iðgjaldaskuldar.
  • Heimild til að nota „case by case“ aðferð við útreikning tjónaskuldar þegar um er að ræða tjónakröfur með lítilli óvissu.
  • Að til væru aðferðir til að nálga iðgjaldaskuld og tjónaskuld en ekki var farið í forsendur þeirra.

Í umfjöllun um útreikning skaðatryggingaáhættu var getið þeirra gagna sem vátryggingafélög þurfa að gefa upp um iðgjöld og tjónshlutfall aftur í tímann fyrir einstakar vátryggingagreinar.

Á fundinum 12. júní fyrir líftryggingafélög var fjallað um útreikning líftryggingaskuldar, þ.á m. eftirtalin atriði:

  • Greinaskiptingu, en flestar tegundir líftryggingasamninga hjá innlendum líftryggingafélögum flokkast undir annað hvort söfnunarlíftryggingar (contracts where the policyholder bears the investment risk) eða samninga án ágóðahlutdeildar (other contracts without profit participation clauses).
  • Hvaða áhættuþátta taka á tillit til.

Á fundinum kom fram að í hefðbundnum dánaráhættutryggingum ætti ekki að taka tillit til endurnýjunariðgjalda.

Í umfjöllun um útreikning líftryggingaáhættu var eftirfarandi getið:

  • Þeir áhættuþættir sem skipta mestu máli eru dánaráhætta (mortality), sjúkdómaáhætta (disability), kostnaðaráhætta (expense) og stjórtjónaáhætta (catastrophe).
  • Öll líftryggingafélögin geta notað þær einfaldanir sem boðið er upp á.
  • Ef ekki eru notaðar einfaldanir er krafan vegna flestra áhættuþátta reiknuð með áfallaprófi (scenario test).

Næsti fundur um QIS4 er fyrirhugaður 14. júlí nk. kl. 13:30 þar sem umfjöllunarefnið verður skil fyrir samstæður.

Til baka



Language


Þessi síða notar vefkökur.
Lesa meira

X
Þetta vefsvæði byggir á Eplica