Fjármálaeftirlitið birtir aðferðafræði og almenn viðmið vegna framkvæmdar könnunar- og matsferlis FME
Fjármálaeftirlitið
hefur birt aðferðafræði
sína og almenn viðmið vegna framkvæmdar könnunar- og matsferlis stofnunarinnar.
Tilgangur skjalsins er að skilgreina og kynna
aðferðafræði og framkvæmd könnunar- og matsferlis Fjármálaeftirlitsins.
Aðferðafræðin byggir á viðmiðunarreglum Evrópsku bankaeftirlitsstofnunarinnar
(EBA) um könnunar- og matsferli frá desember 2014 og vinnur Fjármálaeftirlitið
samkvæmt þeim viðmiðunarreglum frá ársbyrjun 2016 þegar þær tóku gildi.
Í kafla 2 er fjallað almennt um aðferðafræði könnunar- og
matsferlisins, þar sem fram kemur hvernig fjármálafyrirtæki eru flokkuð eftir
áhrifavægi og lýsing á vöktun lykiláhættumælikvarða, mati á einstökum
áhættuþáttum, heildaráhættumati, eftirlitsaðgerðum og áhættumatseinkunnum. Þá
er í kafla 3 sérstaklega fjallað um mat Fjármálaeftirlitsins á eiginfjárþörf og
aðgerðir vegna ónógs eigin fjár.
Til viðbótar við þessi viðmið og almenna aðferðafræði mun
Fjármálaeftirlitið birta leiðbeinandi tilmæli, eða eftir atvikum leiðbeiningar
og viðmið, um mat á einstökum áhættuþáttum. Birting á aðferðafræði og viðmiðum
er í samræmi við stefnu Fjármálaeftirlitsins um gagnsæi í starfsemi
stofnunarinnar, en ekki er gengið lengra en nauðsynlegt er svo sem með birtingu
á lykiláhættumælikvörðum, heildaráhættumatseinkunn og breytum vegna flokkunar á
áhrifavægi fjármálafyrirtækja. Að mati stofnunarinnar getur slík birting aukið
líkur á eftirlitshögnun og í einhverjum tilvikum unnið gegn því huglæga mati
sem liggur að baki könnunar- og matsferli.
Fjármálaeftirlitið telur ástæðu til að benda á að
hugtakanotkun í skjalinu styðst við gildandi lög um fjármálafyrirtæki, nr.
161/2002 og stjórnvaldsfyrirmæli sett með stoðum í þeim. Hugtök verða uppfærð
þegar tilefni gefst til.