Leiðbeinandi tilmæli

Með gildistöku nýrra laga nr. 30/2003 um verðbréfasjóði og fjárfestingasjóði hafa orðið miklar breytingar á starfsheimildum og starfsskilyrðum rekstrarfélaga verðbréfasjóða. Hafa starfsheimildir rekstrarfélaga verið útvíkkaðar þannig að auk reksturs verðbréfasjóða og annarra sjóða um sameiginlega fjárfestingu er þeim heimilt að sinna eignastýringu og fjárfestingarráðgjöf. Þá má nefna að verðbréfasjóðir eru stofnaðir og reknir af rekstrarfélagi í stað þess að vera sjálfstæðir lögaðilar. Þá hefur sú grundvallarbreyting orðið að rekstrarfélög verðbréfasjóða falla nú undir lög nr. 161/2002, um fjármálafyrirtæki. Bar rekstrarfélögum, skv. 4. mgr. ákvæðis I til bráðabirgða við lögin að sækja um starfsleyfi sem fjármálafyrirtæki fyrir 1. júlí sl.

Til að hljóta starfsleyfi þurfa rekstrarfélög að uppfylla ítarlegar kröfur laga nr. 161/2002; m.a. um starfsskipulag, þ.m.t. innra skipulag, hlutafé, hæfi stjórnenda o.fl. Fjármálaeftirlitið telur því nauðsynlegt að setja fram leiðbeinandi tilmæli um aðskilnað reksturs og vörslu og óhæði rekstrarfélaga verðbréfasjóða skv. 15. gr. laga nr. 30/2003.