Ákvörðun um hækkun sveiflujöfnunarauka
Fjármálaeftirlitið
tók í dag ákvörðun um hækkun sveiflujöfnunarauka í samræmi við tilmæli
fjármálastöðugleikaráðs frá 13. apríl 2018.
Megintilgangur sveiflujöfnunaraukans er að auka
viðnámsþrótt fjármálakerfisins við hugsanlegu tapi í kjölfar aukinnar
sveiflutengdrar kerfisáhættu. Einnig kemur fram að losun aukans veiti
fjármálafyrirtækjum svigrúm til að viðhalda sjálfbæru framboði útlána í
fjármálaniðursveiflu. Sveiflujöfnunaraukinn tekur því breytingum samhliða þróun
sveiflutengdrar kerfisáhættu.
Samfelldur skuldavöxtur heimila og fyrirtækja
síðastliðið ár bendir til þess að sveiflutengd kerfisáhætta hafi aukist.
Húsnæðisverð hefur vikið nokkuð frá undirliggjandi þáttum á sama tíma sem
jafnframt bendir til aukinnar kerfisáhættu. Þar að auki hefur áhætta einnig
aukist innan afmarkaðra geira sem ekki er unnt að bregðast við með sértækum
aðgerðum að svo stöddu. Í tilmælum fjármálastöðugleikaráðs er sérstaklega bent
á sterkan upptakt í fjármögnunarsveiflunni og samspil útlána vegna
atvinnuhúsnæðis og fasteignaþróunarverkefna og hás verðs á þeim markaði. Einnig
er bent á að eftirlitsaðilar eigi, í bili að minnsta kosti, erfitt með að meta
þörf fyrir beitingu sértækra stjórntækja vegna húsnæðismarkaðar og áhrif af
beitingu slíkra stjórntækja. Verði mögulegt að bregðast við fyrrgreindum
áhættuþáttum með sértækum úrræðum á næstu misserum mun Fjármálaeftirlitið kanna
hvort tilefni sé til að beita þeim og meta hvaða áhrif það hefur á gildi
sveiflujöfnunarauka. Slík endurskoðun gæti átt sér stað fyrir gildistöku
ákvörðunar um hækkun sveiflujöfnunarauka.
Ákvörðun Fjármálaeftirlitsins felur í sér að sveiflujöfnunaraukinn hækkar úr
1,25% í 1,75% á innlendar áhættuskuldbindingar allra fjármálafyrirtækja, bæði
hvers fyrir sig og á samstæðugrunni, nema þeirra sem eru undanskilin aukanum
samkvæmt 4. mgr. 86. gr. d laga um fjármálafyrirtæki, og mun hún taka gildi eftir
12 mánuði. Við útreikning eigin fjár sem viðhalda skal ber að líta til vegins
meðaltals sveiflujöfnunarauka hér á landi og í öðrum ríkjum á Evrópska
efnahagssvæðinu, í samræmi við hlutdeild áhættuskuldbindinga í hlutaðeigandi
ríkjum, sbr. 3. mgr. 86. gr. d sömu laga.
Hér má finna nánari upplýsingar um eiginfjárauka.