Starfsleyfi greiðslustofnana

Þeim einum er heimilt að veita greiðsluþjónustu sem hafa til þess leyfi samkvæmt lögum nr. 114/2021 um greiðsluþjónustu. Skv. 23. tölul. 3. gr. laganna er einungis eftirfarandi aðilum heimilt að veita greiðsluþjónustu: Fjármálafyrirtækjum með heimild til móttöku innlána og veitingu útlána, rafeyrisfyrirtækjum, póstgíróstofnunum, greiðslustofnunum, Seðlabanka Evrópu og seðlabönkum ríkja á Evrópska efnahagssvæðinu, stjórnvöldum ef greiðsluþjónusta tengist ekki hlutverki þeirra, og tilteknum lögaðilum sem fengið hafa undanþágu samkvæmt 35. gr. laga um greiðsluþjónustu.

„Greiðsluþjónusta telst vera

a) Þjónusta sem gerir kleift að leggja reiðufé inn á greiðslureikning ásamt öllum aðgerðum sem nauðsynlegar eru til rekstrar greiðslureiknings.

b) Þjónusta sem gerir kleift að taka reiðufé út af greiðslureikningi ásamt öllum aðgerðum sem nauðsynlegar eru til rekstrar greiðslureiknings.

c) Framkvæmd greiðslna, þ.m.t. millifærslur fjármuna á og af greiðslureikningi hjá greiðsluþjónustuveitanda notanda eða hjá öðrum greiðsluþjónustuveitanda:

a. framkvæmd beingreiðslna, þ.m.t. einstakra beingreiðslna,
b. framkvæmd greiðslna með greiðslukorti eða sambærilegum búnaði
c. framkvæmd millifærslu fjármuna, þ.m.t. boðgreiðslna.

d) Framkvæmd greiðslna ef fjármunir eru tryggðir með lánalínu fyrir notanda greiðsluþjónustu:

a. framkvæmd beingreiðslna, þ.m.t. einstakra beingreiðslna,
b. framkvæmd greiðslna með greiðslukorti eða sambærilegum búnaði,
c. framkvæmd millifærslu fjármuna, þ.m.t. boðgreiðslna.

e) Útgáfa greiðslumiðla og/eða færsluhirðing greiðslna.

f) Peningasending.

g) Greiðsluvirkjun.

h) Reikningsupplýsingaþjónusta.

Umsókn um leyfi til að starfa sem greiðslustofnun skal vera skrifleg og skulu henni fylgja tilteknar upplýsingar. Fjármálaeftirlitið hefur útbúið yfirlit yfir þær upplýsingar sem stofnunin fer fram á að fylgi umsókn.

Gátlista vegna umsóknar um starfsleyfi sem greiðslustofnun má finna í þjónustugátt.

Fjármálaeftirlitið hefur eftirlit með þeim aðilum sem stunda greiðsluþjónustu skv. lögum um greiðsluþjónustu.  Á grundvelli framangreinds hefur Fjármálaeftirlitið sett reglur um tryggilega varðveislu fjármuna sem greiðslustofnun móttekur nr. 88/2020.    

Til baka





Þetta vefsvæði byggir á Eplica