Áhætta tengd fjárfestingum í svonefndum jafningjalánum
Að gefnu tilefni vill Fjármálaeftirlitið koma á framfæri eftirfarandi upplýsingum vegna svonefndra jafningjalána (e. peer-to-peer lending), sem einnig eru nefnd hóplán (e. lending-based crowdfunding).
Með jafningjalánum er almennt átt við lán til einstaklinga, og eftir atvikum lögaðila, sem almenningi stendur til boða að taka þátt í að fjármagna fyrir milligöngu svonefndra jafningjalánamiðlana (e. peer-to-peer lending platform), oft í gegnum vefsíðu, með loforði um endurgreiðslu og ákveðna ávöxtun.
Neytendum sem hafa áhuga á að fjárfesta og taka þannig þátt í að fjármagna jafningjalán er bent á að kynna sér fyrir fram upplýsingar um áhættuna sem slíkum fjárfestingum fylgir og hafa eftirfarandi í huga:
- Áhættan sem slíkum fjárfestingum fylgir er meiri en þegar fjármunir eru lagðir inn á innlánsreikning í viðskiptabanka og sparisjóði.
- Slíkar fjárfestingar njóta ekki lágmarksverndar í samræmi við lög nr. 98/1999 um innstæðutryggingar og tryggingakerfi fyrir fjárfesta.
- Almennt eru slíkar fjárfestingar ekki innleysanlegar að hluta eða öllu leyti með skömmum fyrirvara.
- Veiting jafningjalána og starfsemi jafningjalánamiðlana er almennt ekki leyfisskyld og lýtur því ekki eftirliti Fjármálaeftirlitsins nema starfsemin feli jafnframt í sér eftirlitsskylda starfsemi samkvæmt lögum nr. 87/1998 um opinbert eftirlit með fjármálastarfsemi, svo sem greiðsluþjónustu, sbr. lög nr. 120/2011 um greiðsluþjónustu, sjá einnig hér.
- Neytendur ættu einungis að nota fjármuni í slíkar fjárfestingar sem þeir eru reiðubúnir að tapa.